Categoría: eventos

Estás a procurar un agasallo novo e orixinal para este Nadal? Este ano, ademais dos móbiles, os ordenadores e os reprodutores de música, tamén podes optar por lectores de libros electrónicos, que tamén atoparás con opción en galego.

Libros electrónicos

Un destes lectores é o Inves-WIBOOK 600T, con pantalla de 6 polgadas e cartón de memoria de 2 GB incorporado. Ademais, dispón de conexión wifi e permite cargar máis de 14.000 páxinas e le formato PDF e ePub (o formato estándar do libro electrónico). Os libros pódense subir a través dunha conexión USB ou ben descargar a través da rede a través de tendas especializadas ou con contidos libres.

Inves tamén dispón de modelos máis sinxelos e económicos, como o Inves-Book 500, que tamén ten menú en galego, unha capacidade de almacenamento de 512 MB con posibilidade de aumentar a memoria ata os 4GB e a posibilidade de ler PDF, ePub e documentos en formato Doc, TXT, HTML, JPG, PRC e RTF.

Neira Vilas, Yolanda Castaño ou Suso de Toro, dixitalizados!

Xa temos a posibilidade de adquirir obras en formato electrónico na nosa lingua. Un exemplo é a editora Galaxia, que ten dispoñibles 72 libros en formato PDF a través da plataforma Todoebook. Pódense mercar as obras de grandes autores das letras galegas como Blanco Amor (A Esmorga), Otero Pedrayo (A Lagarada, Arredor de si) ou Rosalía de Castro (Follas Novas), xunto a escritores actuais como Yolanda Castaño (O libro da egoísta), Miguel Anxo Fernández (Un nicho para Marilyn) ou Álvarez Cáccamo (Vento de sal), e teñen previsto ir incorporando o catálogo completo da editora.

Pola súa banda, Xerais tamén ten dispoñibles varios títulos en Todoebook. Así, Dime algo suciode Diego Ameixeiras pódese mercar en formato electrónico por 11€, e os lectores que queiran descargar Sete Palabras de Suso de Toro poden facelo por 13,3€.

Pero ademais de obras literarias tamén se poden atopar outras de carácter educativo, comoCiencias da natureza 1º ESO, un compendio de artigos enciclopédicos, elementos multimedia e outros recursos, onde os rapaces poden buscar información sobre as plantas, os animais, o sistema solar ou a atmosfera. Para os alumnos de 3º da ESO tamén hai materiais relacionados con bioloxía e xeoloxía.

E para aqueles que gusten da literatura e queiran falar tanto de calquera destes títulos como doutros, poden incorporarse á nova rede social do libro, Redelibros.com

Aplicacións para Android, iPhone e iPad

Pero se un, ademais de obras escritas, busca aplicacións na nosa lingua para o seu teléfono intelixente (iPhone ou Android) ou ben para tablets como o iPad, tamén se poden descargar. Así, por exemplo, a empresaSinaptika ten dispoñible a través do App Store «Imaxes de Galicia», que permite percorrer a través de fotografías e descricións os espazos máis fermosos de Galicia, como as illas Cíes, a cadetral de Santiago, a praia das Catedrais… e usar estas fotografías como fondo de pantalla do iPad.

Para iPhone e iPad tamén creou Galaxia unha aplicación na que seleccionou os seus mellores contos impresos para convertelos nunha experiencia interactiva. Contoplanet permite ler contos, escoitar as súas locucións en tres idiomas e mesmo dá a posibilidade de que o lector grave a narración, lle dedique o conto a alguén e mesmo o personalice. Hai zonas táctiles, efectos de son e animacións, de modo que se pode desfrutar cada conto de diversas formas; unha delas é ver e escoitar os contos de forma automática, coma se se tratase dun filme.

Cunha aplicación para iPad tamén conta O soldadiño de chumbo, unha publicación multiformato en galego. Ademais do libro e dunha curtametraxe de animación, pódese desfrutar dun produto interactivo no que as personaxes de Andersen se relacionarán de maneira interactiva cos lectores a través da tableta electrónica de Apple.

Pola súa banda, os que usan móbiles con Android poden ter no seu terminal desde tradutores galego-español de xeito gratuíto ou consultar o tempo a través da información de Meteogalicia. Tamén poden acceder á banda electrónica grazas a aplicacións como a que lanzou Caixa Galicia.

Xogos: bota unhas carreiras no móbil ou canta co Galeoke

Doutra banda, boa parte dos terminais móbiles que veñen xa co menú en galego ofrecen tamén incluídos nos terminais un bo número de xogos electrónicos no noso idioma. É o caso de Rally Stars (EA Sports), Asphalt Elite Racing (Gameloft), Bounce Tales, o Sudoku ou mesmo o coñecido xogo da serpe.

Hoxe en día moitos deles xa están dispoñibles nos máis de 100 terminais enlingua galega que se poden adquirir en calquera dos principais operadores móbiles, como Movistar, Vodafone, Orange, Yoigo ou R.

Pero se tamén queres gozar dun xogo en compañía dos teus amigos e botabas de menos un de karaoke tipo Singstar pero en galego, tes que saber que xa existe oGaleoke. Podes imitar os teus artistas galegos favoritos e ir sumando puntos segundo teñas mellor ou peor voz. Pódese mercar a partir do 21 de decembro nas tendas de discos e en www.toupa.net, onde tamén atoparás referencias doutros produtos galegos.

Teléfonos móbiles intelixentes

Os usuarios teñen a opción de conseguir un terminal en galego a partir do seu provedor ou ben mercándoo libre en diferentes plataformas e páxinas web. O primeiro fabricante en apostar polo galego nos seus menús foi Alcatel, incorporando o noso idioma a todos os seus terminais. É o caso do OT-E101, do OT-E102, OT-E103, OT-E111, do OT-S120 ou do OT-800.

Sony Ericsson tamén ten un feixe de terminais con galego. Así, desde a firma sinalan que todos os modelos da gama XPERIA o incorporan. En concreto, trátase dos modelos X10, X10 mini, X10 mini pro e X8. Pero, ademais, o Sony Ericsson Vivaz e o Vivaz pro veñen con menú na nosa lingua.

Pola súa banda, o fabricante que máis móbiles vende no mundo, Nokia, tamén incorpora en moitos dos seus modelos o galego. É o caso dos máis recentes, como o E72, o C7, o C6, o C3, o X2, o 2730, o 2720, o 7230 ou o 3710.

Outro dos fabricantes que máis vende, Samsung, tamén está a ofrecer en lingua galega varios dos seus terminais con máis tirón, como é o caso do Samsung Wave, o modelo GT-S8500, aínda que sinalan que o idioma pode variar dependendo da compañía telefónica e das edicións especiais, polo que o mellor sempre é consultar antes co distribuidor. Tedes todo un repertorio de terminais enwww.oteumobilengalego.com

Televisión dixital interactiva

Para os televisivos, R ofrece na súa televisión de pagamento unha guía electrónica de programación en galego, coa cal se pode consultar o que van emitir as diferentes canles e ter información en detalle dun filme ou dunha serie de televisión na nosa lingua. Ademais, teñen previsto ofrecer aplicacións interactivas a través do televisor, como información metereolóxica, acceso a unha axenda con eventos culturais ou consulta de noticias.

Pola súa parte, aqueles que prefiran ver películas e series a través dun disco duro multimedia teñen no mercado varios aparellos, como o T60 que fabrica Blue:Sens. Esta firma tamén dispón de sintonizadores TDT con alta definición, como o T14, o T35 ou o T120-S. Doutra banda, pódense atopar rreprodutores de DVD con menú en galego (modelo H25), gravadores de DVD (DVD-5111, DVD-5022) e mesmo aparellos para sintonizar a TDT e gravar DVD cun disco duro incorporado (H40).